- मङ्लबार, कार्तिक १८, २०८३ / Tuesday, Nov, 03 ,2026
फूलजोर, २० जेठ – पूर्व पश्चिम राजमार्ग अन्तर्गत सर्लाहीको ईश्वरपुर नगरपालिका–५, फूलजोर चोकमा आज दिउँसो टिप्परको ठक्करबाट एक जना प्रहरी जवानको मृत्यु भएको छ ।
दुर्घटनामा सर्लाहीको मलङ्गवा नगरपालिका–३, निवासी मुस्लिम आयोगका सदस्य मोहम्मद सम्सुल हकको पिएसओको रुपमा कार्यरत बाजुराको बडीमालिका नगरपालिका–६, घर भएका प्रहरी जवान ३० वर्षीय मिनबहादुर दानीको मृत्यु भएको हो । टिप्परको ठक्करबाट गम्भीर घाइते भएका प्रहरी जवान दानीलाई सर्लाहीको लालबन्दीस्थित मोडेल अस्पतालमा सामान्य उपचारपश्चात थप उपचारका लागि एल.एस. न्यूरो अस्पताल बारा पुर्याउँदा चिकित्सकले मृत घोषणा गरेको जिल्ला प्रहरी कार्यालय सर्लाहीका प्रवक्ता एवं प्रहरी नायब उपरीक्षक (डिएसपी) सरोज राईले बताए ।
आज दिउँसो १ बजेतिर बयलवासबाट फूलजोरतर्फ आउँदै गरेका प्रहरी जवान दानी सवार बीआर ०१ एफ जे ६९६१ नम्वरको मोटरसाइकललाई रानिगन्जबाट फूलजोरतर्फ गइरहेको ना. १ क ८५२० नम्वरको टिप्परले फूलजोर चोकमा ठक्कर दिएको थियो । दुर्घटनामा संलग्न टिपर प्रहरी चौकी फूलजोर र चालक इलाका प्रहरी कार्यालय केशरगन्ज, बयलवासको नियन्त्रणमा रहेका छन् ।
मृतक प्रहरी जवान दानी नेपाल प्रहरीको सशस्त्र प्रहरी गण नं. १ गुल्म नं. २ नक्साल काठमाडौंमा दरबन्दी रहेर मुस्लिम आयोगका सदस्य हकको पिएसओको रुपमा कार्यरत थिए ।
सर्लाहीमा केही दिनअघि मात्रै पूर्व पश्चिम राजमार्गस्थित बागमती नगरपालिका–१, मिलनचोकमा टिप्परले मोटरसाइकललाई ठक्कर दिँदा मोटरसाइकल चालकको मृत्यु भएको थियो भने पछाडि सवार व्यक्ति घाइते भएका थिए ।
अहिले एशियन मापदण्डमा निर्माण भइरहेको पूर्व पश्चिम राजमार्ग विस्तारको काममा माटो ओसार्न व्यापक मात्रामा टिप्परको प्रयोग भइरहेको छ । ति टिप्पर लापरवाही ढंगले चलाउँदा दुर्घटना बढेको स्थानीयले गुनासो गरेका छन् ।
