- बिहिबार, कार्तिक २०, २०८३ / Thursday, Nov, 05 ,2026
परवानिपुर – सर्लाहीको लालबन्दी नगरपालिका–१६, परवानिपुरमा बिहीबार न्यू उदय सामाजिक उद्यमी महिला कृषि सहकारी संस्थाको कृषिजन्य वस्तु संकलन तथा बजारिकरण केन्द्रको नवनिर्मित भवन उद्घाटन गरिएको छ ।
संस्थाकी अध्यक्ष अस्मिता थापा मगरको अध्यक्षतामा मधेश प्रदेशसभाकी सदस्य बेची लुंगेलीले भवनको उद्घाटन गरेकी हुन् । सो कृषिजन्य वस्तु संकलन तथा बजारिकरण केन्द्रमा स्थानीय किसानले दुध ल्याएर बेच्छन् भने चिस्यान केन्द्र समेत संचालनमा छ ।
केन्द्रको भवन निर्माणका लागि स्थानीय वुद्धिबहादुर सुनुवार र उनकी पत्नी अस्मिता थापा मगरले ८ धुर जग्गा प्रदान गरेका छन् । संस्थाले थप १२ धुर जग्गा किनेर भवन बनाएको हो ।
संस्थामा सामान्य वर्गका एक हजार भन्दा बढी महिला दिदी बहिनी आवद्ध छन् । प्रदेशसभा सदस्य लुंगेलीले स्थानीय महिला दिदी बहिनीले दुध बेचेर तथा बाख्रापालन गरेर राम्रो उन्नति गरिरहेको देखेर आफूले पनि भवन निर्माणमा सहयोग गरेको बताईन् ।
महिलाहरुले ५ रुपैयाँबाट सुरु गरेर अहिले दुध संकलनसँगै चिस्यान केन्द्र संचालन गर्न सक्नेसम्मको अवस्थामा पुगेका हुन् । संस्थामा दैनिक ३ सय लिटर भन्दा बढी दुध संकलन हुन्छ ।
