धनुषाकाे बनदेवीमाई गोल्डकपकाे उपाधी हरिवनले चुम्याे

हरिवन – सर्लाहीको हरिवन युवा क्लबले धनुषाको बटेश्वरमा आयोजित ११ औँ बनदेवीमाई (अध्यक्ष) गोल्डकप फुटबल प्रतियोगिताको उपाधि चुमेकाे छ ।

विहिबार सम्पन्न फाइनल खेलमा सहलेश युवा क्लब, सिरहालाई २-१ गोलले पराजित गर्दै हरिवन युवा क्लबले १ लाख ५० हजार रूपैया सहित प्रथम उपाधी चुमेकाे हाे । हरिवनको जितमा रवी पासवान एक्लैले दुई गोल गरेका छन् । नेपाल पुलिस क्लबमा आवद्ध रवीले खेलको मध्यान्तरअघि र इन्जुरी समयमा गाेल गरेका थिए । शल्हेशले आत्मघाती एक गोल उपहार पायो । कर्नर बललाई ‘क्लियर’ गर्न खोज्दा हरिवनको रक्षापंक्तिका खेलाडीले आत्मघाती गोल गर्न पुगे ।

उपबिजेता सहलेशले ५० हजार रुपैंयामै चित्त बुझाउनु परेकाे छ । फाइनल खेलमा बिजेता हरिवनका लागि दुई गोल गर्ने रवी पासवान नै म्यान अफ दी म्याच बने । यस्तै, राष्ट्रिय टिमका पूर्व कप्तान समेत रहेका हरिवनका जुमानु राई उत्कृष्ट मिडफिल्डर घाेषणा सहित विशेष सम्मानित भए भने उत्कृष्ट प्रशिक्षक हरिवनका दीपक लामा भए ।

बनदेवीमाई युवा क्लब बटेश्वर गाउँपालिका-२, सीतापुर धनुषाले आयोजना गरेको प्रतियोगिताको बिजेता, उपबिजेता, उत्कृष्ट खेलाडी र प्रशिक्षकलाई नेपाली काँग्रेसका सह-महामन्त्री महेन्द्र राय र मधेश प्रदेश सरकारका वन वातावरण, पर्यटनमन्त्री शत्रुधन महतोले पुरस्कार वितरण गरे ।