श्रीमान-श्रीमतिको एकसाथ दाहसंस्कार : छोराछोरीको बिचल्ली

टंक बहादुर क्षेत्री/विष्णु, १० चैत – सर्लाहीको भारतीय सीमावर्ती विष्णु गाउँपालिका स्थित वाराउद्योरण गाउँमा श्रीमान र श्रीमतिको एकसाथ दाहसंस्कार गरिएको छ ।

श्रीमान ललन सिंहको शव देख्ने वितिकै श्रीमति संगिता सिंहलाई हर्टअट्याक भएको र उपचारका क्रममा उनको पनि मृत्यु भएको हो । बुबाआमाको एकसाथ मृत्यु भएपछि २ छोरी र एक छोराको भने विचल्ली भएको छ । नेपाली कांग्रेस महासमिति सदस्य समेत रहेका स्थानीय अजित सिंहका अनुसार घटना गत बुधबारको हो ।

महिना दिनअघि एक्कासी ‘बमिट’ सँगै पेट समेत दुःखेपछि ५० वर्षीय ललन उपचारका लागि सितामाढी पुगेका थिए । डा. सुनिल सिंहले आन्द्राको शल्यक्रिया गर्नुपर्ने भनेपछि सोही अनुसार उपचार गराएपनि एकसाता अघि फेरि ललनको पेट दुख्यो । फेरि पेट दुख्यो भन्दै पूराना चिकित्सककोमा पुग्दा डा. सिंहले दोहोर्याएर शल्यक्रिया गरे । शल्यक्रिया पश्चात अस्पतालमै ‘बेडरेष्ट’ गरिरहेका ललनसँग उनकी श्रीमति संगिता पनि थिईन् ।

कांग्रेस नेता सिंहका अनुसार तर गत मंगलबार राती अस्पतालमै ललनको मृत्यु भयो । अनि अस्पतालले एम्बुलेन्समा हालेर ललनको शव वाराउद्योरण पठायो र संगितालाई श्रीमानलाई घर पठाईसकिएको खबर गर्यो । संगिता पनि श्रीमानलाई ठिक भएर पठाईएको होला भन्ठान्दै टेम्पो चढेर बुधबार बिहान ४ बजेतिर घर आईपुगिन् ।

घर आईपुगेपछि उपचार पश्चात ठिक भयो होला भन्ठानेकी श्रीमानको शव देखेपछि एक्कासी ४५ वर्षीया संगितालाई हर्टअट्याक भयो । तत्काल नजिकै भारतको मेजरगंज स्थित अस्पतालमा पुर्याउँदा चिकित्सकले संगितालाई पनि मृत घोषणा गरेको सिंहले बताए ।

बुधबार स्थानीय बासिन्दाले नगद सहयोग संकलन गरेर श्रीमान–श्रीमतिको एकैठाउँमा दाहसंस्कार गरेका छन् । ‘उपचार गराउँदा गराउँदै र दुईवटी छोरीको विबाह गर्दा उनिहरको ऋण पनि निकै रहेछ’, सिंहले भने, ‘आर्थिक अवस्था निकै कमजोर भएकाले हामी गाउँलेले आर्थिक सहयोग संकलन गरेर दाउरा लगायत आवश्यक सामानहरु किनेर दुवैजनाको एकै ठाउँमा दाहसंस्कार गर्यौं ।’ आम्दानीको कुनै बाटो नभएको र ऋण पनि थुप्रै भएको अवस्थामा एकमात्र सहारा श्रीमानको पनि मृत्यु भएपछि संगितालाई हर्टअट्याक भएको हुनसक्ने स्थानीयले अनुमान गरेका छन् ।

दुई छोरी र एक छोराको बिचल्ली

दुईवटी छोरीको भारततर्फ विवाह गरिसके पनि ललन-संगिताका दुई छोरी र एक छोरा घरमै छन् । सिंहका अनुसार छोरीहरु शिवानी सिंह सर्लाही क्याम्पस मलंगवामा स्नातक तह दोस्रो वर्ष अध्ययनरत रहेपनि आर्थिक अभावले भर्ना लगायत समस्याका कारण पढ्न छाडिसकेकी छिन् । त्यस्तै अर्की छोरी सालुले १२ कक्षा पास गरेपनि आर्थिक अभावकै कारण थप अध्ययन गर्न नपाएको सिंहले जानकारी दिए । करिब २० वर्षका एकमात्र छोरा भोला सुस्त मनस्थिती एवं शारिरिक रुपमा अपांग समेत रहेका छन् । छोरा भोलाले दागवती दिन नसक्ने भएका कारण भतिजा ऋतिक रोशन सिंहले ललन र संगिताको शवमा दागवत्ति दिएका थिए ।

सिंहका अनुसार बहादुरपुर-बाराउद्योरण सडक चौंडा सहित कालोपत्रे गर्न सूरु भएकाले सडकमा परेपछि उनिहरुकाे घर पनि भत्कदै छ । ‘कोही दाताहरु भए छोरीहरुको अध्ययन अध्यापन तथा छोराको उद्धार गरिदिए हुन्थ्यो’, सिंहले आग्रह गरे, ‘बुबाआमा एकसाथ गुमाएपछि छोराछोरीको बिचल्ली भएको छ ।’