- बिहिबार, कार्तिक २०, २०८३ / Thursday, Nov, 05 ,2026
मलंगवा – सर्लाही सदरमुकाम मलङ्गवामा प्रहरीको कडा सुरक्षाका बीच गणेश पूजाको मूर्ति शुक्रबार विर्सजन गरिएको छ ।
प्रहरीको बाक्लो उपस्थितिमा शिवसागर चोक नजिकको पोखरीमा सबै स्थानको मूर्ति एकैसाथ सेलाउने काम गरिएको हो ।
सर्लाही प्रहरीका प्रवक्ता डीएसपी दीपेन्द्र पन्जियार थारुका अनुसार शुक्रबार साँझ ७ बजेभित्र मूर्ति विसर्जनपश्चात मलङ्गवा बजार क्षेत्रको अवस्था सामान्य नै छ । उनले राति कुनै पनि किसिमका प्रदर्शन नभएका बताए ।
मूर्ति विर्सजन गर्न लैजानेक्रममा बिहीबार साँझ दुई समुदायबीच झडप भएपछि सदरमुकाम मलङ्गवामा कफ्र्यु आदेश जारी गर्नुपरेको छ ।
बिहीबार राति १० बजेदेखि लगाइएको कफ्र्यु शनिबार पनि जारी नै रहेको जिल्ला प्रशासन कार्यालयले जनायो । सुरक्षा अवस्थाबारे समिक्षापश्चात कफ्र्युका बारेमा निर्णय हुने प्रमुख जिल्ला अधिकारी इन्द्रदेव यादवले बताए ।
निरन्तरको कफ्र्युका कारण मलङ्गवाको जनजीवन भने कष्टकर बन्दै गएको छ । हाटबजार बन्द छन् सवारी साधन सञ्चालन हुन सकेका छैनन् । सरकारी कार्यालय, बैङ्क तथा वित्तीय संस्थाका सेवा ठप्प जस्तै रहेकाले अत्यावश्यक काम परेका सेवाग्राही मारमा परेका छन् ।
सदरमुकाम मलङ्गवामा झडप रोक्न बिहीबार साँझदेखि नै बाक्लो मात्रामा नेपाल प्रहरी र सशस्त्र प्रहरी तैनाथ गरिएको छ । जिल्लाभरका युनिटबाट थप मद्धत टोली मलङ्गवा उतारिएको छ । सुरक्षा स्रोतबाट प्राप्त जानकारी अनुसार ठूलो संख्यामा नेपाली सेना समेत तयारी हालतमा मलङ्गवामै लगेर राखिएको छ ।
शनिबर बसेको सर्वपक्षिय/सर्वदलिय बैठकले शान्ति भंग गर्ने कार्यमा संलग्न दोषीलाई पक्राउ गरी कानून बमोजिमको कारवाही गर्ने निर्णय गरेको थियो ।
