बागमतीमा १८ करोड लागतमा आर्यघाट बन्ने

बागमती – सर्लाहीको बागमतीमा १८ करोडको लागतमा व्यवस्थित आर्यघाट निर्माण गर्न सुरु गरिएको छ ।

अन्तिम संस्कार गर्ने ठाउँ राम्रो नभएको र जथाभावी अन्तिम संस्कार गर्दा खोला फोहोर हुने भएपछि बागमती नगरपालिकाले सुविधा सम्पन्न आर्यघाट बनाउन लागेको हो । बागमती नगरपालिका–१२, स्थित बागमती नदी किनारमा निर्माण हुने आर्यघाटको आज (शनिबार) बिहान हरिवन नगरपालिका–९, निवासी १०२ वर्षीय बबरजङ्ग थापाको हातबाट शिलान्यास गरिएको छ ।

नगरपालिकाले आफ्नो आन्तरिक स्रोत तथा सङ्घ र प्रदेश सरकारबाट पनि सहयोग लिएर आर्यघाट निर्माण गर्न लागेको बागमती नगरपालिकाकी उपप्रमुख लिलाकुमारी मोक्तानले उज्यालो अभियानसँग बताइन् । छिमेकी पालिका हरिवन नगरपालिकाले समेत आर्यघाट निर्माणमा सहयोग गर्ने प्रतिवद्धता जनाएको उपप्रमुख मोक्तानले जानकारी दिईन् ।

आर्यघाट निर्माणका लागि पृथ्वी इन्जिनियर्स एण्ड विल्डर्स प्रा.लि. बत्तिसपुतली, काठमाडौँले भ्याटसहित १८ करोड १४ लाख २९ हजार ५८ रुपियाँ ४१ पैसामा ठेक्का सकार गरेको बागमती नगरपालिका कार्यालयले जनाएको छ । २०८१ साल असोज २१ गतेभित्र आर्यघाट निर्माण सक्ने गरी सम्झौता भएको छ । आर्यघाटमा क्रियापुत्री बस्ने स्थल, पितृ प्रसाद पकाउने र ग्रहण गर्ने ठाउँ, महादेवको मूर्तिसहितको मन्दिर, फूलबारीलगायत अन्य संरचना निर्माण हुने बताइएको छ ।

आर्यघाट शिलान्यास कार्यक्रममा बागमती नगरपालिकाका प्रमुख भरतकुमार थापा, हरिवन नगरपालिकाका प्रमुख कमल बुढाथोकी (रमेश) लगायतले मन्तव्य राखेका छन् । जिल्लाको बागमती, हरिवन, लालबन्दी, ईश्वरपुर, बरहथवालगायत पालिकाबाट पार्थिव शरीर अन्तिम संस्कारका लागि बागमती पुर्याउने गरिएको छ ।