सर्लाहीको मुर्तिया जंगलमा धारिलो हतियार प्रहार गरी युवकको हत्या

बरहथवा – सर्लाहीको हरिपुर नगरपालिका–१, स्थित मुक्तेश्वर सामुदायिक वनमा शनिबार धारिलो हतियार प्रहार गरी एक युवकको हत्या भएको छ ।

मुक्तेश्वर सामुदायिक वन क्षेत्रभित्र पर्ने बागमती सिँचाईको नहरमा रौतहटको गुजरा नगरपालिका ५ बस्ने अन्दाजी ३१ वर्षीय विष्णुसिंह घिसिङको हत्या भएको हो । घिसिङको घाँटीमा धारिलो हतियार प्रहार गरी हत्या गरिएको अवस्थामा शव फेला परेको सर्लाही प्रहरीका प्रवक्ता डीएसपी माधव प्रसाद बुढथोकीले उज्यालो अभियानसँग बताए ।

मृतकको शव घटनास्थलबाट भर्खरै (शनिबार राती १० बजे) पोष्टमार्टमका लागि प्रादेशिक अस्पताल मलंगवा पठाइएको छ । घिसिङ रौतहटबाट मूर्तियास्थित आफन्तको घरमा आएको भन्ने खुलेपनि विस्तृत विवरण खुल्न बाँकी रहेको प्रहरीले बताएको छ ।

घटनाको अनुसन्धान र अपराधमा संलग्नहरुको खोजी गर्न इलाका प्रहरी कार्यालय बरहथवाबाट डीएसपी उमाशंकर प्रसाद यादव नेतृत्वको प्रहरी टोली परिचालन भइसकेको छ । शनिबार अपरान्ह साँढे ४ बजेतिर हत्याको घटना जानकारी पाउनासाथ डीएसपी यादव नेतृत्वको प्रहरी टोली घटनास्थलमा पुगेको थियो ।

डीएसपी यादवले दिउँसो पानी परेर रोकिएपछि घटना भएको जस्तो देखिएको उज्यालो अभियानसँग बताएका छन् । ‘लास मलंगवा पठाएर म भर्खरै घटनास्थलबाट फर्किदै छु,’ डीएसपी यादवले शनिबार राती १०ः३० बजे उज्यालो अभियानका समाचार प्रमुख जनार्जन खत्रीसँग भने, ‘घटनाको अनुसन्धान सुरु भइसकेको छ ।’

सर्लाही प्रहरीका प्रमुख (एसपी) प्रविण पोखरेलले घटनास्थलमा जनकपुरबाट तालिम प्राप्त कुकुर झिकाइएको बताए । उनले घटनामा संलग्न रहेको हुन सक्ने आशंकामा केही व्यक्तिविरुद्ध प्रहरीले निगरानी बढाइसकेको बताएका छन् ।

घटनास्थल आपराधिक घटना भइरहने क्षेत्रको रुपमा पर्छ ।