- शनिबार, कार्तिक १५, २०८३ / Saturday, Oct, 31 ,2026
बागमती, ०३ मंसिर – पूर्वपश्चिम राजमार्ग अन्तर्गत सर्लाहीको बागमती नगरपालिका–११, रायमाझी चोक नजिक कारको ठक्करबाट एक जनाको मृत्यु भएको छ ।
दुर्घटनामा बागमती नगरपालिका–४, प्रसाई टोल बस्ने ५० वर्षीय केशव शिवाकोटीको मृत्यु भएको हो । शिवाकोटीलाई मङ्गलबार राति बागमतीमा बालाचतुर्दशी मेला हेरेर घरतर्फ फर्कदै गर्दा नम्बर खुल्न नसकेको कारले ठक्कर दिएको इलाका प्रहरी कार्यालय कर्मैयाले जनाएको छ ।
कारको ठक्करबाट गम्भीर घाइते भएका शिवाकोटीको उपचारका क्रममा बुधबार बिहान न्यूरो अस्पताल वीरगन्जमा मृत्यु भएको हो । पैदलयात्रीलाई ठक्कर दिएर फरार भएको कारले बागमती प्रदेश ०३–००१ ख ३४५५ नम्वरको यात्रुबाहक बसलाई समेत ठक्कर दिएको प्रहरीले जनाएको छ ।
इलाका प्रहरी कार्यालय हरिवनका निमित्त प्रमुख एवं बरिष्ठ प्रहरी नायब निरीक्षक दीपेन्द्र मल्लले दुर्घटनामा संलग्न कारको खोजी भइरहेको उज्यालो अभियानसँग बताए । उनले दुर्घटना गराएर फरार कारको लगभग पहिचान भइसकेको जानकारी दिएका छन् ।
मानिसको मृत्यु हुने गरी दुर्घटना गरार कार र चालक फरार भएपछि घटनाबारे बुझ्न जिल्ला प्रहरी प्रमुख (एसपी) योगेन्द्रकुमार खड्का आफै बुधबार बिहान बागमती आएका छन् ।
