महिन्द्र राय यादव जीतकाे नजिक, मतगणना स्थल बाहिर विजयाेत्सव सूरु

यादवले २२ हजार ६३१ मत ल्याउँदै निकतम प्रतिद्वन्द्वी महताेभन्दा दुईहजार ४६६ मतले अग्रता लिएका छन् । खसेकाे ७४ हजार ७५५ मतमा ७१ हजार १४७ मत गणना हुँदाकाे परिणाम हाे याे । अब गणना हुन तीनहजार ६०८ मत मात्र बाँकी रहेकाले यादवकाे अवस्था विजयाेन्मुख देखिएकाे छ । महताेले जीत निकाल्न भने गणना हुन बाँकी मतमा अकल्पनीय ढंगकाे परिणाम अर्थात यादवलाई एकहजार १४२ मतमै राेक्नु पर्ने हुन्छ

टंक बहादुर क्षेत्री/मलंगवा- प्रतिनिधि सभा एवं प्रदेश सभा निर्वाचन २०७९ अन्तर्गत मुलुकमै चासाेका साथ हेरिएका क्षेत्रहरु मध्य सर्लाही क्षेत्र नम्बर २ काे मतगणना अन्तिम चरणमा पुगेकाे छ ।

लाेकतान्त्रिक समाजवादी पार्टीका वरिष्ठ नेता राजेन्द्र महताे र नेपाल समाजवादी पार्टीका अध्यक्ष महिन्द्र राय यादव जस्ता चर्चित मधेशवादी नेताहरु एकअर्का विरुद्द चुनावी मैदानमा भएकाले पनि याे क्षेत्रकाे मतपरिणाममा अधिकांशकाे ध्यान खिचेकाे छ । पछिल्लाे मतपरिणाम अनुसार नेकपा माओवादीकाे हँसिया हताैडा चुनाव चिन्हमा उठेका यादव जीतकाे नजिक पुगेका छन् ।

यादवले २२ हजार ६३१ मत ल्याउँदै निकतम प्रतिद्वन्द्वी महताेभन्दा दुईहजार ४६६ मतले अग्रता लिएका छन् । खसेकाे ७४ हजार ७५५ मतमा ७१ हजार १४७ मत गणना हुँदाकाे परिणाम हाे याे । अब गणना हुन तीनहजार ६०८ मत मात्र बाँकी रहेकाले यादवकाे अवस्था विजयाेन्मुख देखिएकाे छ । महताेले जीत निकाल्न भने गणना हुन बाँकी मतमा अकल्पनीय ढंगकाे परिणाम अर्थात यादवलाई एकहजार १४२ मतमै राेक्नु पर्ने हुन्छ । गणनाका क्रममा यसअघि दुवैजनाले पाएकाे मत ´रेसियाे` हेर्ने हाे महताेकाे पक्षमा परिणाम उल्टिन असम्भव प्राय देखिन्छ ।

यादवकाे जीत सुनिश्चित भएकाे भन्दै उनका समर्थक नेता कार्यकर्ताहरु मतगणना स्थल सदरमुकाम मलंगवा स्थित जिल्ला समन्वय समितिकाे तीनबिगे मैदानमा उल्लेख्य रुपमा जम्मा भएर नाराबाजी सहित विजयाेत्सव मनाउन सूरु गरिसकेका छन् । कार्यकर्ताहरुले मतगणना स्थल बाहिर रहेका यादवलाई बधाई दिँदै फूलमाला र खादा पहिर्याईसकेका छन् भने उनिसँग सेल्फि खिच्न कार्यकर्ताहरुकाे तछाँडमछाँड सूरु भईसकेकाे छ ।

उनीहरु दुईजना धेरै पटक एउटै पार्टीमा सहयात्री भएर काम गर्ने अनि अनेकौं पटक फुट्ने मात्र हैन, एक आपसमा लड्ने (निर्वाचन) समेत गरेका छन् । २०७० सालको दोस्रो संविधान सभा निर्वाचनमा पनि करिब-करिब सोही स्थानहरु पर्ने तत्कालिन ४ नम्बर क्षेत्रमा भएकाे दुईजना बीचकाे चुनावी भिडन्तमा यादवले बाजि मारेका थिए ।

२०७४ मा पनि यादव सोही क्षेत्रबाट निर्वाचित भएका हुन् । महतोले २०७४ सालमा भने नेकपा एमालेकाे सहयाेगमा धनुषा ३ बाट निर्वाचित हुँदा नेपाली कांग्रेसका नेता विमलेन्द्र निधीलाई पराजित गर्न सफल भएका थिए । यसपटक धनुषा ३ मा नेकपा एमाले नेतृ जुली महतो आफै उम्मेद्वार बन्ने भएपछि महतो आफ्नो पुरानै मैदानमा यादवसँग पुनः भिड्न आमनेसामने भएका हुन् । पुरानाे हारकाे बदला लिने अठाेटका साथ पुनः यादवसँग भिड्न आएका महताे यसपटक पनि पछाडी पर्ने र यादवले दाेस्राे जीत दर्ज गर्ने अवस्था देखिएकाे छ । तथापी नतिजा नै थाहा पाउन त अन्तिम मतपरिणाम कुर्नै पर्ने हुन्छ ।