- बुधबार, भदौ ३, २०८३ / Wednesday, Aug, 19 ,2026
बागमती – सर्लाहीको बागमतीमा जारी छैठौँ राजर्षि जनक कप फुटबल प्रतियोगिता अन्तर्गत अहिले शनिबार दिउँसाे ४ बजेर १६ मिनेटबाट सशस्त्र प्रहरी बलकाे एपीएफ क्लब र अफ्रिकन एभिनिर फुटबल क्लब क्यामरुन बीच खेल सूरु भएकाे छ ।
स्व. सन्तोष श्रेष्ठ स्मृति खेल मैदानमा दुई टिमबीच हुने खेल अत्यन्त प्रतिष्पर्धात्मक हुने आयोजक टिमका म्याच कमिस्नर दिपक लामाले जानकारी दिए । ए डिभिजन लिग खेल्ने एपीएफ र अफ्रिकन खेलाडीहरुकाे मात्र एभिनिर फुटबल क्लब क्यामरुन बीचको खेल निकै प्रतिष्पर्धात्मक हुने आयोजकले जनाएको छ । क्यामरुनकाे टिम दुईसाता अघिदेखि नै बागमतीमा आएर स्थानीय वातावरणमा प्रशिक्षणरत थियाे भने सशस्त्र प्रहरी बलकाे एपीएफ क्लबका खेलाडीहरु समेत शुक्रबार नै सर्लाही आईसकेका थिए । एपीएफका खेलाडीहरुका तुलनामा क्यामरुनका खेलाडीहरु शारिरक रुपमा निकै बलिया र अग्ला कदका देखिएका छन् । एपीएफबाट पनि एकजना अफ्रिकन खेलाडी मैदानमा छन् ।
प्रतियाेगितामा एपीएफका खेलाडीलाई प्राेत्साहन दिन सशस्त्र प्रहरी बल मधेश प्रदेश बाहिनी बर्दिबासका बाहिनिपति सशस्त्र प्रहरी नायब महानिरीक्षक गणेश बहादुर ठाडामगर, सर्लाही प्रमुख सप्रउ भरत खनियाँ, राेतहट प्रमुख सप्रउ ध्रुब बहादुर कार्की, हरिवन बेस क्याम्प प्रमुख सप्रनाउ विकास भूजेल लगायत समेत खेल हेर्न उपस्थित छन् ।
प्रतियोगितामा आयोजक बागमती युवा क्लब र एउटा विदेशी क्लब समेत १२ वटा टिमले सहभागिता जनाएका छन् । प्रतियोगितामा नेपाल पुलिस क्लब, सशस्त्र प्रहरीको एपिएफ क्लब, मछिन्द्र फुटबल क्लब, हिमालयन शेर्पा क्लब, न्यूरोड टिम एनआरटी, नव जनजागृति युवा क्लब सीमरा, सुदूरपश्चिम–११ धनगढी, केबीए ग्लोबल बीएफसी चितवन, ध्रुबतारा स्पोर्टिङ क्लब दमक, विदेशी टिम एभिनिर फुटबल क्लब क्यामरुन र आयोजक बागमती युवा क्लबले भाग लिएका आयोजक बागमती युवा क्लबका सचिब कुमार प्रधानले जानकारी दिए ।
जसमध्ये ध्रुबतारा स्पोर्टिङ क्लब झापा दमक हिमालयन शेर्पा क्लब काठमाडौंसँग, नव जन जागृति युवा क्लब सिमरा नेपाल पुलिस क्लबसँग र केबीए ग्लोबल बीएफसी चितवन एनआरटीसँग पराजय व्यहोरेर प्रतियोगिताबाट बाहिरिसकेका छन् । प्रतियोगिताको बिजेताले १० लाख १ हजार र उपबिजेताले ५ लाख ५ सय पुरस्कार प्राप्त गर्ने छन् ।
त्यस्तै प्रतियोगिताकै सर्वोत्कृष्ट खेलाडीलाई नगद ५१ हजार, प्रतियोगिताकै उत्कृष्ट गोलकिपर, प्रशिक्षक, मिडफिल्डर र रक्षकलाई पनि नगद २५–२५ हजार, हरेक खेलको म्यान अफ दि म्याच हुने खेलाडीलाई नगद १० हजार र प्रतियोगितामा उत्कृष्ट खेल प्रदर्शन गर्ने बागमती नगरपालिका भित्रका एक खेलाडीलाई बागमती राईजिङ् अफ दि ईयर प्लेयर्स घोषणा गर्दै एक थान नयाँ मोटरसाईकल प्रदान गरिने आयोजक बागमती युवा क्लबका अध्यक्ष किस्मत मैनालीले जानकारी दिए ।
फाेटाे क्याप्सन् : दुवै टिमका खेलाडीहरु । (तस्बिर : उज्यालाे अभियान)
