सुरु भयो तेस्रो लालबन्दी महोत्सव

लालबन्दी, ०४ चैत – “आर्थिक समृद्धि र स्वरोजगारको आधार : कृषि, पर्यटन, उद्योग र व्यापार भन्ने मूल नारासहित तेस्रो लालबन्दी महोत्सव आजदेखि सुरु भएको छ ।

लालबन्दी नगरपालिका–९, बस्तीपुरस्थित भूदेव खाद्य उद्योग परिसरमा आज दिउँसो मधेश प्रदेशका उद्योग, वाणिज्य तथा पर्यटन मन्त्री कनिश पटेलको प्रमुख आतिथ्यतामा महोत्सवको उद्घाटन गरिएको हो । उद्योग वाणिज्य संघ लालबन्दीको आयोजनामा सुरु भएको महोत्सव चैत १५ गतेसम्म संचालन हुने महोत्सव व्यवस्थापन समितिका संयोजक दीपेन्द्रकुमार बलम्पाकीले जानकारी दिए । उनका अनुसार महोत्सव उद्घाटनअघि आज मध्यान्ह लालबन्दीस्थित पूर्वपश्चिम राजमार्गमा विभिन्न जातजाति तथा समुदायको पहिचान झल्कने झाँकी, बाजागाजासहितको र्याली निकालिएको छ ।

महोत्सवमार्फत स्थानीय उत्पादन तथा सेवाको बजारीकरण, आन्तरिक तथा बाह्य लगानी प्रवद्र्धन, रोजगारीका अवसरहरुको सिर्जना, उद्यमशीलताको विकास तथा स्थानीय कला–संस्कृति, परम्परा र पहिचानको संरक्षण एवं प्रवद्र्धनमा योगदान पुग्ने विश्वास लिइएको उद्योग वाणिज्य सङ्घ लालबन्दीले जनाएको छ ।

१२ दिनसम्म सञ्चालन हुने महोत्सवमा एक लाख २० हजार दर्शक आउने आयोजकको अपेक्षा छ । महोत्सवमा करिव १० करोड रुपियाँ बराबर आर्थिक कारोबार हुने अनुमान गरिएको उद्योग वाणिज्य संघ लालबन्दीका अध्यक्ष महेशकुमार महतोले बताए । उनका अनुसार महोत्सव सञ्चालन गर्न करिव एक करोड पाँच लाख रुपियाँ खर्च लाग्ने अनुमान गरिएको छ ।

महोत्सवमा कृषि उत्पादन प्रदर्शनी, औद्योगिक तथा व्यवसायिक स्टल, अटोमोबाइल प्रदर्शनी, घरेलु तथा हस्ताकला प्रदर्शनी, होटल तथा रेस्टुरेन्ट सेवा, स्थानीय पर्यटकीय स्थलको प्रचार, होमस्टे अवधारणा प्रवद्र्धन, राष्ट्रियस्तरका कलाकारबाट प्रत्येक दिन साँस्कृतिक कार्यक्रम रहेको आयोजकले जनाएको छ ।

महोत्सवस्थलमा सर्वसाधारणका लागि १०० रुपियाँ र विद्यार्थी, ज्येष्ठ नागरिक तथा अपाङ्गता भएका व्यक्तिलाई परिचयपत्रका आधारमा ५० रुपैयाँ प्रवेश शुल्क तोकिएको छ ।