सर्लाहीमा ‘मिटर ब्याजी’ विरुद्ध १४ सय ७२ वटा उजुरी, फेरि एक साता मयाद थप

मलंगवा – सर्लाहीमा मिटरब्याजीविरुद्ध हालसम्म १४ सय ७२ वटा उजुरी परेको छ । आईतबारसम्म जिल्ला प्रशासन कार्यालय मलंगवामा उक्त उजुरीहरु परेको हो ।

उजुरी अझै बढ्न सक्ने भन्दै पुनः एक हप्ता समय थप गरिएकाे छ । मिटरब्याज अर्थात् अनुचित लेनदेन जाँचबुझ आयोगले नै उजुरी लिने म्याद जेठ १४ गतेसम्म थप भएको जिल्ला प्रशासन कार्यालय मलंगवाले जनाएको छ । सर्लाहीका मिटरब्याजी पीडित कोही उजुरी दिन छुटेको भए जेठ १४ गतेसम्म कार्यालयमा आएर उजुरी दिन सकिने सहायक प्रमुख जिल्ला अधिकारी होम प्रसाद घिमिरेले जानकारी दिए । यसअघि जेठ १ गतेदेखि ७ गतेसम्म पहिलो पटक एक साता म्याद थप भएको थियो ।

पीडितले निरन्तर उजुरी दिइरहेकाले थप उजुरी आउन सक्ने ठानेर एक साता म्याद थप भएको हो । सहायक प्रजिअ घिमिरेले पीडितहरु निरन्तर उजुरी लिएर आइरहेका र अब अन्तिम पटक १ साता म्याद थप गर्दा २ हजार जति उजुरी पुग्ने अनुमान गरिएको बताए । मिटरब्याजी साहुले लिएको ऋण भन्दा बढीको कागज बनाउने गरेको र ऋण तिरेपछि पनि अझ धेरै ऋण बाँकी रहेको भन्दै कागज देखाएर घर, घडेरी नै आफ्नो नाममा पास गर्न थालेपछि पीडितहरु जिल्ला प्रशासन कार्यालयमा उजुरी दिन पुगिरहेका छन् ।
पछिल्ला वर्षमा मिटरब्याजी पीडितले आन्दोलन गर्न थालेपछि उनीहरुको पीडा बाहिर आइरहेको छ ।

सर्लाहीमा पनि मिटरब्याजी पीडितले पटक-पटक आन्दोलन गर्दै आइरहेका छन् । त्यही आन्दोलन र उजुरीपछि यहाँका ‘मिटरब्याजी’ आराेपी श्याम परदेशी, संजय रौनियार र रामबाबु यादव जिल्ला अदालतकाे आदेश अनुसार कारगार चलान भएका थिए । यादव र राैंनियार उच्च अदालतकाे आदेशले छुटिसकेका छन् भने परदेशी कारागारमै छन् ।

अनुचित लेनदेन अर्थात् मिटरब्याज सम्वन्धी जाँचबुझ आयोगले गत वैशाख २० गते सदरमुकाम मलंगवा स्थित जिल्ला प्रशासन कार्यालय मलंगवामा सरोकारवालाहरुसँग अन्तरक्रिया सहित प्रारम्भिक जानकारी लिने र आवश्यक सल्लाह सुझाव संकलन गरेको थियो । मधेश प्रदेशको राजधानी जनकरपुरधाममा आयोगको कार्यालय स्थापना भएपश्चात आयोगका अध्यक्ष गौरीबहादुर कार्की र सदस्य उत्तमराज सुवेदी उक्त दिन सर्लाही आएर मिटरब्याज पीडित, नागरिक समाज, जनप्रतिनिधि, सुरक्षा अधिकारी, दलका प्रतिनिधि, मिटरब्याजविरुद्धका अभियन्तालगायत अन्य सरोकारवालासँग मलंगवामा छलफल गरी प्रारम्भिक अवस्था बुझेर फर्किएका थिए । सर्लाहीमा आयोग गठन हुनु पूर्व नै मिटरब्याज साहुविरुद्ध ६८० भन्दा बढी उजुरी परेका थिए ।