- शनिबार, अशोज ३, २०८३ / Saturday, Sep, 19 ,2026
हरिवन, २८ भदौ – सर्लाहीको हरिवन नगरपालिका-८ का विभिन्न बस्तीमा शुक्रबार राती र शनिबार बिहान स्यालले टोकेर घाइते भएका मानिस र पशुचौपायको उपचार सुरु भएको छ ।
पछिल्लो अपडेट अनुसार एउटा स्यालले टोकेर ६ जना मानिस र २५ वटाजति कुकुरसहित पशु चौपाया घाइते भएका छन् । उनीहरुको उपचारका लागि स्वास्थ्य चौकी हरिवन, नगर अस्पताल सासापुरबाट स्वास्थ्यकर्मी परिचालन तथा पशु स्वास्थ्य शाखाबाट पशुको उपचारका लागि टोली खटिएको नगरप्रमुख रमेश बुढाथोकीले बताए ।
हरिवन नगरपालिकाको स्वास्थ्य शाखाका प्रमुख रामबाबु चौधरीले तत्कालका लागि छिमेकी पालिकाबाट रेबिजविरुद्धको खोप मगाएर घाइते मानिसहरुको उपचार भइरहेको बताए ।
पशुचौपायका लागि लगाउने रेबिजको खोप उपलब्ध नै रहेको पशु स्वास्थ्य शाखाका डा. महेश श्रेष्ठले बताए । आतंकित पार्ने स्याललाई स्थानीयले नियन्त्रणमा लिएर मारिसकेका छन् ।
