१० दिन बन्द भएको चन्द्रनगर गाउँपालिका आजदेखि खुल्दै

3
चन्द्रनगर गाउँपालिका कार्यालय ।

चन्द्रनगर – सर्लाहीको चन्द्रनगर गाउँपालिकाको कार्यालय १० दिनपछि खुलेको छ ।

सदरमुकाम मलङ्गवास्थित जिल्ला प्रशासन कार्यालयमा हिजो भएको छलफलमा आन्दोलनका सबै कार्यक्रम स्थगित गरेर गाउँपालिकाको कामकाज सूचारु गर्ने सहमति भएको थियो । त्यस अनुसार गएसाँझबाटै गाउँपालिकाको मुल गेटमा जारी धर्ना रोकिएको छ भने ताला पनि खुलेको छ ।

आजदेखि नियमित कामकाज सूचारु हुने गाउँपालिका कार्यालयले जनाएको छ । चन्द्रनगरस्थित नाढीताल परिसरमा रहेको गाउँपालिकाको केन्द्र वडा नं. २ बबरगञ्जमा सार्न खोजिएपछि स्थानीय वासिन्दा, वडा नं. ४ का केही तथा वडा नं. ६ र ७ का सम्पूर्ण जनप्रतिनिधि र नेपाली काँग्रेसका नेता कार्यकर्ता फागुन २१ गते सुक्रवारदेखि गाउँपालिकामा तालाबन्दी गरेर मूलगेटमा धर्नामा बसेका थिए ।

हिजोकोे छलफलमा तत्कालका लागि गाउँपालिका कार्यालय चन्द्रनगरमै रहने दिने, आन्दोलित पक्षले आन्दोलनका सबै कार्यक्रम स्थगित गर्नेलगायतका सहमति भएको छलफलमा सहभागी नेपाली काँग्रेसका पूर्व पार्टी जिल्ला सभापति सत्यदेवसिंह दनुवारले जानकारी दिए । छलफलमा गाउँपालिका अध्यक्ष महेन्द्र महतो, अन्य जनप्रतिनिधि, चन्द्रनगरमा क्रियाशील राजनीतिक दलका प्रतिनिधि, सुरक्षा अधिकारीलगायतको उपस्थिति रहेको थियो ।

जिल्लाको दक्षिण–पूर्वी भेगमा पर्ने चन्द्रनगर गाउँपालिकाको केन्द्र सार्न फागुन २२ गते विशेष गाउँ सभा बसेको थियो तर सभामा गाउँपालिकाको केन्द्र सार्न आवश्यक पर्ने दुईतिहाई बहुमत पुग्न सकेको थिएन् ।