सर्लाहीमा कोरोना खोप लगाउने एकहजार २८६ जना पुगे

4
बुधबार खोप अभियान उद्घाटनका अवसरमा खोप लगाउदै जिल्ला अस्पतालका मेडिकल सुपरिटेण्डेन्ट डा. संजिव सिंह ।

मलंगवा – कोरोना भाइरसविरुद्धको खोप अभियान अन्र्तगत सोमबार छैठौं दिन सर्लाहीमा खोप लगाउनेको संख्या एकहजार २८६ जना पुगेको छ ।

सोमबार लालबन्दी र ईश्वरपुर नगरपालिका तथा चन्द्रनगर गाउँपालिका ३३० जनालाई खोप दिईएको छ । तीनवटै पालिकाका स्वास्थ्यकर्मी सहित अग्रपंक्तिमा काम गर्ने राष्ट्रसेवक कर्मचारी, सुरक्षाकर्मी लगायत गैर सरकारी क्षेत्रमा कार्यरत अग्रपंक्तिमा काम गर्नेहरुलाई खोप लगाईएको जिल्ला जनस्वास्थ्य कार्यालयका वरिष्ठ जनस्वास्थ्य प्रशासक श्रवण नायकले जानकारी दिए । आज (मंगलबार) विष्णु र कौडेना गाउँपालिकाका स्वास्थ्यकर्मी सहित अग्रपंक्तिमा काम गर्ने कर्मचारी एवं सुरक्षाकर्मीलाई तथा ईश्वरपुर नगरपालिकाका छुटपुट भएकालाई समेत कोरोना खोप लगाईनेछ ।

आईतबार रामनगर गाउँपालिका र बलरा नगरपालिकाका २४८ जनालाई लगाईएको थियो । यसअघि शनिबार चक्रघट्टा र बसबरिया गाउँपालिका तथा गोडैता नगरपालिकाका २६० जनालाई कोरोना भाईरस विरुद्धको खोप लगाईएको थियो ।

शुक्रबार पर्सा र ब्रम्हपुरी गाउँपालिकामा अग्रपंक्तिमा काम गर्ने स्वास्थ्यकर्मी सहित २०४ जनालाई खोप लगाइएको थियो । बुधबार पहिलो दिन र विहिबार दोस्रो दिन मलंगवा नगरपालिकाका क्रमशः १२९ र ११५ जना स्वास्थ्यकर्मी, सफाईकर्मी, कार्यालय सहयोगि, सुरक्षाकर्मी लगायतलाई खोप लगाईएको थियो ।

बुधबार सर्लाही जिल्ला अस्पतालका मेडिकल सुपरिटेण्डेन्ट डा. संजिव सिंह, जिल्ला सरकारी वकिल कार्यालयका प्रमुख न्यायाधिवक्ता केशव गौतम, जिल्ला जनस्वास्थ्य कार्यालयका प्रमुख जनस्वास्थ्य प्रशासक श्रवण कुमार नायकलले खोप लगाएर अभियानको उद्घाटन गरेका थिए । जिल्ला जनस्वास्थ्य कार्यालयको अनुमानित तथ्यांक अनुसार जिल्ला स्थित २० पालिकामा फ्रण्टलाईनमा काम गर्ने झण्डै ६ हजार ६ सय ३९ जना रहेका छन् । सोही तथ्यांंकका आधारमा जिल्लाबाट कोरोना विरुद्धको ७ हजार डोज खोप माग गरिएको थियो । तर ५ हजार ३०० डोजमात्र प्राप्त भएको प्रमुख जिल्ला अधिकारी सुरेन्द्र पौडेलले बताए ।

प्रजिअ पौडेलका अनुसार क्रमशः स्वास्थ्यकर्मी, सफाईकर्मी, सुरक्षाकर्मी, अग्रपंक्तिमा खटिने अन्य राष्ट्रसेवक कर्मचारी, महिला स्वास्थ्य स्वयं सेविका लगायतलाई खोप दिईने छ । पहिलो पटक लगाएका व्यक्तिलाई पूनः ४ हप्तापछि दोस्रो डोज खोप लगाईने छ । भारत सरकारले अनुदानमा दिएको १० लाख डोज कोभिशिल्ड खोप बुधबारबाट नेपालभर लगाउन सूरु गरिएको हो ।