सर्लाहीमा थप २६० जनालाई कोरोना खोप

बुधबार खोप अभियान उद्घाटनका अवसरमा खोप लगाउदै जिल्ला अस्पतालका मेडिकल सुपरिटेण्डेन्ट डा. संजिव सिंह ।

मलंगवा – कोरोना भाइरसविरुद्धको खोप अभियान अन्र्तगत शनिबार चौथो दिन सर्लाहीमा २६० जनालाई खोप लगाईएको छ । यो सहित सर्लाहीमा उक्त खोप लगाउनेको संख्या ७०८ जना पुगेका छन् ।

शनिबार दिनभर चक्रघट्टा र बसबरिया गाउँपालिका तथा गोडैता नगरपालिकाका २६० जनालाई कोरोना भाईरस विरुद्धको खोप लगाईएको जिल्ला जनस्वास्थ्य कार्यालयका प्रमुख जनस्वास्थ्य प्रशासक श्रवण कुमार नायकले जानकारी दिए । शुक्रबार पर्सा र ब्रम्हपुरी गाउँपालिकामा अग्रपंक्तिमा काम गर्ने स्वास्थ्यकर्मी सहित २०४ जनालाई खोप लगाइएको थियो । बुधबार पहिलो दिन र विहिबार दोस्रो दिन मलंगवा नगरपालिकाका क्रमशः १२९ र ११५ जना स्वास्थ्यकर्मी, सफाईकर्मी, कार्यालय सहयोगि, सुरक्षाकर्मी लगायतलाई खोप लगाईएको थियो ।

बुधबार सर्लाही जिल्ला अस्पतालका मेडिकल सुपरिटेण्डेन्ट डा. संजिव सिंह, जिल्ला सरकारी वकिल कार्यालयका प्रमुख न्यायाधिवक्ता केशव गौतम, जिल्ला जनस्वास्थ्य कार्यालयका प्रमुख जनस्वास्थ्य प्रशासक श्रवण कुमार नायकलाई खोप लगाएर अभियानको उद्घाटन गरिएको थियो ।
आईतबार रामनगर गाउँपालिका र बलरा नगरपालिकाका गाउँपालिकाका स्वास्थ्यकर्मी लगायत अग्रपंक्तिमा काम गर्ने राष्ट्रसेवक सुरक्षाकर्मी लगायतलाई खोप लगाईने जनस्वास्थ्य प्रशासक नायकले जानकारी दिए ।

जिल्ला जनस्वास्थ्य कार्यालयको अनुमानित तथ्यांक अनुसार जिल्ला स्थित २० पालिकामा फ्रण्टलाईनमा काम गर्ने झण्डै ६ हजार ६ सय ३९ जना रहेका छन् । सोही तथ्यांंकका आधारमा जिल्लाबाट कोरोना विरुद्धको ७ हजार डोज खोप माग गरिएको थियो । तर ५ हजार ३०० डोजमात्र प्राप्त भएको प्रमुख जिल्ला अधिकारी सुरेन्द्र पौडेलले बताए ।

प्रजिअ पौडेलका अनुसार क्रमशः स्वास्थ्यकर्मी, सफाईकर्मी, सुरक्षाकर्मी, अग्रपंक्तिमा खटिने अन्य राष्ट्रसेवक कर्मचारी, महिला स्वास्थ्य स्वयं सेविका लगायतलाई खोप दिईने छ । पहिलो पटक लगाएका व्यक्तिलाई पूनः ४ हप्तापछि दोस्रो डोज खोप लगाईने छ । भारत सरकारले अनुदानमा दिएको १० लाख डोज कोभिशिल्ड खोप बुधबारबाट नेपालभर लगाउन सूरु गरिएको हो ।