हरिपुरमा ५० जना छोरीको शिक्षा बीमा

211
छोरी शिक्षा बीमा कार्यक्रममा ल्याईएका बालिका बोक्दै हरिपुर नगरपालिकाका मेयर जमिरुद्धिन मन्सुर (बायाँ) एवं उपमेयर रेणुका काफ्ले तथा साथमा प्रमुख प्रशासकीय अधिकृत उदय प्रसाद देवकोटा । (तस्बिर सौजन्य : उपमेयर रेणुका काफ्लेको फेसबुक वाल)

हरिपुर – सर्लाहीको हरिपुर नगरपालिकामा ५० जना छोरीको शिक्षा बीमा गरिएको छ ।

प्रदेश २ सरकारको ‘मुख्यमन्त्री बेटी पढाउ, बेटी बचाउ अभियान’ अन्तर्गत निःशुल्क छोरी शिक्षा बीमा शिविर तथा स्वास्थ्य परिक्षण कार्यक्रम सोमबार प्रारम्भ गरिएको नगरप्रमुख जमरुद्धिन मन्सुरले जानकारी दिए । कार्यक्रम अन्तर्गत सोमवार ५० जना बालिकाको खाता खोलिएको र थप ११२ जना छोरीहरुको नाम दर्ता भइसकेकाले मंगलवारबाट क्रमैसँग बैंक खाता खोलिने नगरप्रमुख मन्सुरले बताए । जिल्लाका सबै पालिकाले अहिले २०७५ माघ १ गतेपछि जन्मिएका छोरीहरुको धमाधम शिक्षा बीमा गरिरहेका छन् ।

शनिवार र आइतवार लालबन्दी नगरपालिकामा आयोजित बीमा शिविरमा २४४ जना छोरीहरुको शिक्षा बीमा गरिएको थियो । जिल्लामा केही दिन अघि ईश्वरपुर नगरपालिकाबाट छोरी शिक्षा बीमा कार्यक्रम सूरु गरिएको थिए ।

बालिकाहरुलाई १ लाख २५ हजार रुपैयाँको विमा गर्ने गरी प्रदेश २ सरकारले यो कार्यक्रम प्रदेशभर नै सञ्चालन गरिरहेको हो । बीमाको लागि प्रदेश सरकारले प्रभु बैंकसँग यसअघि नै सम्झौता गरिसकेको छ । प्रदेश सरकारले नवजात बालिकाको नाममा एकमुष्ट रकम जम्मा गरेपछि २० वर्ष पछि बैंकले बालिकालाई १ लाख २५ हजार रुपैयाँ उपलब्ध गराउने कार्यक्रममा उल्लेख छ ।