सर्लाही पनि रंगियो छठको सजियाघाटले (फोटो फिचर सहित)

शुक्रबार साँझ देखिएको पिपरिया स्थित लखन्देही खोला किनारमा छठको सजियाघाट । (तस्बिर : उज्यालो अभियान)

हरिवन – छठ पर्वको मुख्य दिन आज साँझ अस्ताउँदो सूर्यलाई पूजा आराधना गरी अर्घ्य दिने क्रममा जलाशयमा निर्माण गरिएका सजियाघाटहरु सजिएर झकिझकाउ बनेका छन् ।

शुक्रबार साँझ देखिएको लालबन्दीको डुमडुमे शिव मन्दिर स्थलको पोखरी स्थित छठको सजियाघाट । (तस्बिर : उज्यालो अभियान)

सर्लाहीमा सदरमुकाम मलंगवासहित बागमती नदी, मनुष्मारा नदी, लखन्देही खोला, ढंग्रा खोला, हरिवन, नवलपुर, लालबन्दी, ईश्वरपुर, बरहथवा लगायत जिल्लाभरका पोखरी, नहर लगायत जलाशयमा सरसफाई गरी बनाईएका सजियाघाट साँझ झकिझकाउ देखिएका थिए । झल्लर बत्ति, अतिसबाजी, सर्वसाधारणको भिडभाड लगायत कारणले सजियाघाट झकिझकाउ बनेको हो । व्रतालु र परिवारका सदस्य पूजाको सामग्री लिएर जलाशयमा जाने सर्बसाधारणको भिडभाडले दिउँसैबाट सजियाघाट स्थल झकिझकाउ बनेको हो ।

सर्लाहीका प्रायजसो सजियाघाटमा पुग्नका लागि शुक्रबार साँझ विभिन्न राजनैतिक दलका नेता, मन्त्री, सांसद्, मेयर, उपमेयर सहितका पदाधिकारीहरुलाई भ्याई नभ्याई थियो । सबैजसो नेता तथा पदाधिकारीहरु हस्याङ्फस्याङ् गर्दै सजियाघाटमा पुगेका थिए ।

सर्लाहीका प्रमुख जिल्ला अधिकारी सुरेन्द्र पौडेलले शुक्रबार छठ पर्व शान्तिपूर्ण रुपमा सम्पन्न भएको जानकारी दिए । ‘छठपर्वका अवसरमा शुक्रबार साँझ सजियाघाटमा व्रतालु, सर्बसाधारणहरुको भिडभाड बाहेक अन्य कुनै अपृय घटना भएको छैन’, प्रजिअ पौडेलले भने, ‘म जिल्लाको पश्चिम भेग बलरासम्म पुगेर आएँ, सबैतिर शान्तिपूर्ण र उल्लासपूर्ण रुपले छठपर्व मनाएको पाईएको छ ।’

कार्तिक शुक्ल चतुर्थीदेखि सप्तमीसम्म मनाइने छठ पर्व अस्ती बुधबारदेखि सुरु भएको हो । छठ पर्वको पहिलो दिन स्नान गरी एक छाक खाएर बस्ने गरिन्छ । दोस्रो दिन कार्तिक शुक्ल पञ्चमीमा सखर हालेर बनाइएको खीर (खरना) षष्ठी मातालाई चढाएर अलिकति व्रतालुले प्रसादस्वरुप खाने र नुन नखाएरै एक छाक फलाहार गरिन्छ ।

यो पर्वको मुख्य दिन कार्तिक शुक्ल षष्ठीका दिन शुक्रबार कठोर निराहार व्रत बसी बेलुकी अस्ताउँदो सूर्यलाई पूजा आराधना गरी अर्घ्य दिने विधिविधान छ । शुक्रबार रातभर जागा बसी कात्तिक शुक्ल सप्तमीका दिन शनिबार बिहान उदाउँदो सूर्यलाई पूजा आराधना गरी विधिपूर्वक अर्घ्य दिएपछि यो पर्व समापन हुन्छ । वि.सं. २०४६ अघि तराईको सीमित क्षेत्रमा मनाइने छठले अहिले राष्ट्रिय स्वरुप ग्रहण गरेको छ । छठको अवसरमा आज प्रदेश २ सरकारले बिदा दिएको छ ।

कात्तिक शुक्ल षष्ठीको बेलुकी काठमाडौंको गुह्येश्वरी र कमलपोखरीमा राष्ट्रपतिले समेत छठ पूजा गर्दै आएको कार्यक्रम यस वर्ष कोरोना भाइरसका कारण स्थगित गरिएको जनाइएको छ ।