दुई देशको कडा ‘लकडाउन’ ताेड्दै लागूऔषध सेवनकर्ता

515
लागूऔषध सहित विहिबार पक्राउ परेका महतो ।

मलंगवा – कोरोना भाईरस (कोभिड–१९) को संक्रमणबाट बच्नका लागि नेपाल र भारत दुवैतिर लकडाउन भएपनि लागूऔषध सेवनकर्ता भने लुकिछिपी प्रतिबन्धित औषधी लिन आउनेजाने गरेको देखिएको छ ।

नेपालले गत चैत ११ गते मंगलबार बिहान ६ बजेदेखि तथा भारतले बुधबार राती १२ बजेदेखि लकडाउन घोषणा गरेको थियो । लकडाउनका कारण बाहिर फेर घुम्न दुवै देशमा निकै कडाई गरिएको छ ।

तथापी नेपालतर्फका लागूऔषध सेवनकर्ता भारतीय बजारमा पुगेर त्यस्ता प्रतिबन्धित औषधी खरिद गरेर फर्किने गरेको देखिएको छ ।  सिमा क्षेत्रमा खटिएको सशस्त्र प्रहरीको टोलले विहिबार दिउँसो भारतको सोनवर्षा बजारबाट लागूऔषधको रुपमा प्रयोग हुने प्रतिबन्धित औषधी लिएर नेपालतर्फ आउँदै गरेका एक युवालाई पक्राउ गरेको छ । सर्लाहीको कविलासी नगरपालिका–७, सिरसिया गाउँका लालबाबु महतोलाई सय एमएलको कोझोम एलसीडी नामक १२ बोतल लागूऔषध सहित पक्राउ गरिएको सशस्त्र प्रहरीले जनाएको छ । भारतीय सिमा क्षेत्र स्थित नेपालतर्फको मलंगवा नगपरपालिका स्थित धानखेतको बाटो हुँदै लुकेर आउँदै गरेका महतोलाई सशस्त्र प्रहरीले पक्राउ गरेको हो । धानखेतको आलीमा लगाईएको रहरीको बोटहरुले छेलिएर नेपालतर्फ आईरहेको अवस्थामा महतोको साथबाट उक्त लागूऔषध बरामद भएको हो ।

त्यस्तै दुई दिनअघि पनि एक युवालाई सिरिञ्ज (सुई) मार्फत प्रयोग हुने लागूऔषध सहित सशस्त्र प्रहरीले पक्राउ गरेको थियो । सशस्त्र प्रहरी उपरीक्षक विनोदराज श्रेष्ठले दुवै युवालाई आवश्यक कारबाहीका लागि जिल्ला प्रहरी कार्यालयको जिम्मा लगाईएको जानकारी दिए ।

नाका बाहेक धेरैजसो क्षेत्रफल धानखेत एवं उखुबारी पर्ने भएकाले पनि लागूऔषध सेवनकर्ताहरु लुकिछिपी भारतीय बजारसम्म पुगेर प्रतिबन्धित औषधी लिएर आउने गरेको देखिएको सप्रउ श्रेष्ठले बताए । ‘हाँमीले सकेसम्म सिमाक्षेत्रमा निकै कडाई गरेका छौं’, सप्रउ श्रेष्ठले भने, ‘एकदुईजना पक्राउ परेपनि थप कडाई सहित सिमाक्षेत्रमा निगरानी बढाएका छौं ।’